Benjamin Sesko mendon se mori “vendimin e duhur” duke refuzuar një transferim te Arsenali, pavarësisht lidhjeve të mëdha me një lëvizje në Emirates.
Në sezonin e tij debutues me RB Leipzig, Sesko shënoi 18 gola dhe performanca e tij mbresëlënëse në fushë tërhoqi vëmendjen nga disa klube të Ligës Premier, me Manchester United dhe Arsenal në mesin e klubeve që e donin.
Topçinjtë dukeshin më të afërt për të siguruar nënshkrimin e tij këtë verë, por lojtari zgjodhi të nënshkruajë një marrëveshje të re me skuadrën e Bundesligës, gjë që e ka detyruar Mikel Artetan të kërkojë opsione alternative.
Sesko ka treguar për zgjedhjen e tij në një intervistë për Nogomania, duke theksuar rëndësinë e fitimit të më shumë përvojës dhe mos nxitimit në karrierën e tij.
“E mendova shumë mirë. Unë besoj se kam marrë vendimin e duhur. Doja të fitoja më shumë përvojë, të mësoja më shumë dhe të mos nxitoja gjërat. Leipzig është një klub i shkëlqyer që mund të sigurojë atë që më nevojitet për hapin tjetër. Vizioni i Leipzig është i qartë; gjithçka është e orientuar drejt rritjes, progresit dhe qëllimeve të larta. E ndjeva se ishte e drejtë të vendosja në këtë mënyrë”, deklaroi slloveni.
Sesko pranoi se trajneri i RB Leipzig, Marco Rose, luajti një rol të rëndësishëm në vendimin e tij për të qëndruar në Leipzig.
Kontrata e re e Sesko me RB Leipzig zgjat deri në vitin 2029./Telegrafi/