Djali i shefit të Agjencisë Kosovare të Inteligjencës (AKI) është pjesë e një kallëzimi penal në prokurorinë e Prishtinës.
Zëvëndësprokurori i Prokurorisë Themelore të Prishtinës, Ibrahim Berisha ka konfirmuar se gjatë ditës së djeshme nga Policia e Kosovës kanë pranuar një kallëzim penal ndaj djalit të Shpend Maxhunit, shefit të AKI-së.
Sipas Prokurorisë, personi në fjalë dyshohet për posedim të narkotikëve dhe armëmbajtje pa leje.
“Dje pas dite e kemi pranuar një kallëzim penal. Kam qenë në një takim, por na ka informuar përmes telefonit policia. Unë e di që ka ardhur kallëzimi penal… siç po shifet është emri i djalit tina dhe një kushëri”, deklaroi Berisha, për Kallxo.com.
Ai tha se së bashku me Kryeprokurorin Imer Beka menjëherë janë interesuar për rastin dhe kanë kërkuar që kushdo që e ka shkelur ligjin të vihet përballë organeve të drejtësisë.
“Unë personalisht me kryeprokurorin kemi qenë të angazhuar në këtë ështje dhe kemi biseduar me stacionin e jugut dhe kemi kërkuar urgjentisht pa marrë parasysh kush është në pyetje që e ka shkel ligjin duhet me ardhë”, tha Berisha.