E përditshmja ruse Pravda, e njohur për glorifikimin e figurës së Vladimir Putinit, ka shkruar për atë se si është krijuar atmosferë kaosi pasi që Rusia mobilizoi qindra mijëra ushtarë që i dërgoi për trajnim në Belgorod dhe Taman.
Mediat që shërbejnë si aparat propaganduese të Kremlinit dhe sponsorohen nga qeveria ruse, kësaj radhe kanë publikuar një informacion për të cilin Putini dhe ushtria e tij nuk është gëzuar fare, transmeton Telegrafi.
Sipas këtij mediumi, ushtarët e batalionit të parë të tankeve, nuk kanë nënshkruar kurrfarë marrëveshje me shtetin rus.
Ata morën mitralozat, por jo edhe dokumentet ushtarake. Mobilizimi në asnjë mënyrë nuk është zyrtarizuar, e as që janë hapur llogari bankare për paga.
Luftëtarët thjeshtë janë dërguar në pyje gjashtë ditë më parë, ku jetojnë nëpër istikame që vet i kanë hapur. Media e afërt me Putinin, publikoi rrëfimin e ushtarëve që përshkruajnë kaosin në fushëbetejë.
“Nuk na kanë dhënë tenda, jetojnë në istikame që vet i kemi hapur. Në këto momente jemi 400 persona në Taman dhe nuk planifikojmë të shkojmë diku, derisa të mos konfirmohet ndihma nga shteti”, tha një prej ushtarëve të mobilizuar në Taman, e tjetri konfirmoi se hiq më mirë nuk është në Belgorod.
“Jemi 500 persona të armatosur, por asnjë prej nesh nuk është caktuar në ndonjë njësi, që nga java e kaluar jemi këtu dhe po jetojmë sikur kafshët pa mbështetje logjistike. Nuk kemi absolutisht asgjë, askush nuk po na telefonon. Madje nuk kemi përfunduar kurrfarë trajnimi, vetëm po e blejmë dhe përgatisim ushqimin, e mos të përmendim armët”, shtoi ai. /Telegrafi/