Kryeministri palestinez Mohammad Shtayyeh ka njoftuar dorëheqjen e qeverisë së tij, e cila udhëheq me pjesë të Bregut Perëndimor të pushtuar, për shkak të përshkallëzimit të dhunës në Bregun Perëndimor të pushtuar dhe luftës në Gaza.
“Vendimi për dorëheqjen erdhi në dritën e përshkallëzimit të paprecedentë në Bregun Perëndimor dhe Jerusalem dhe luftës, gjenocidit dhe urisë në Rripin e Gazës”, ka thënë Shtayyeh, i cili i dorëzoi dorëheqjen presidentit Mahmoud Abbas të hënën, shkruajnë mediat e huaja, përcjell Telegrafi.
“Unë shoh se faza tjetër dhe sfidat e saj kërkojnë marrëveshje të reja qeveritare dhe politike që marrin parasysh realitetin e ri në Gaza dhe nevojën për një konsensus palestinezo-palestinez të bazuar në unitetin palestinez dhe shtrirjen e unitetit të autoritetit mbi tokën e Palestinës”, tha ai.
Komentet e Shtayyeh vijnë ndërsa presioni i SHBA-së mbi Abbasin rritet për të filluar punën për një strukturë politike që mund të qeverisë një shtet palestinez pas luftës.
Shtayyeh, një anëtar i Komitetit Qendror të partisë në pushtet Fatah, ka qenë kryeministër palestinez që nga viti 2019.
Raportet fillestare sugjeruan se ai mund të zëvendësohet nga Mohammad Mustafa, një ish zëvendëskryeministër dhe ekonomist i cili është gjithashtu kryetar i Fondit Palestinez të Investimeve. /Telegrafi/