Një ushtar i pensionuar i forcave speciale amerikane është vrarë nga artileria ruse në qytetin ukrainas Bakhmut në lindje të vendit, të cilin ushtria e rregullt ruse dhe mercenarët e Wagnerit po tentojnë ta futin nën kontroll nga fillimi i luftës.
Vdekja e tij u konfirmua nga një mik i ngushtë dhe themelues i një organizate jofitimprurëse që vepron në Ukrainë, transmeton Telegrafi.
“Rreshteri në pension Nicholas Maimer ishte në një ndërtesë në Bakhmut që u shemb pasi u godit nga zjarri i artilerisë”, tha koloneli në pension Perry Blackburn, themeluesi i organizatës jofitimprurëse AFGFree, me të cilin Maimer punonte në Ukrainë.
“Ukrainasit që ishin me Maimer besojnë se ish-pjesëtari i njësisë elitare amerikane, ngeci në ndërtesën pjesërisht të shkatërruar ose u vra nga një breshëri e zjarrit të artilerisë ruse”, shtoi Blackburn.
“Ata u futën në atë pozicion dhe më pas filloi zjarri i rëndë i artilerisë. Ndërtesa filloi të shembet. Shumica e amerikanëve dhe ukrainasve arritën të shpëtonin, por Nick nuk ia doli”, tha për CNN miku i Maimer, një tjetër amerikan.
Konfirmimi i vdekjes së Maimer erdhi pasi Yevgeny Prigozhin, themeluesi i kompanisë ushtarake private ruse Wagner, publikoi një video që ai pretendonte se tregonte trupin e amerikanit të vrarë. /Telegrafi/