Lideri i Lëvizje Vetëvendosje, Albin Kurti, ka bërë të ditur se Iniciativa Qytetare e Shtimes i është bashkuar Vetëvendosjes.
Lajmin e ka bërë të ditur vetë Kurti, përmes një postimi në Facebook, duke thënë se kjo Iniciativë u formua nga një grup intelektualësh në vitin 2017 që për synimin kishin t’i jepnin fund politikave korruptive të qeverisjes lokale në Shtime dhe një alternativë të re zhvillimore kësaj komune.
“Të prirë nga parime të shëndosha dhe progresive, ata gjetën përkrahjen e qytetarëve të Shtimes dhe në vitin 2017 arritën që suksesshëm ta mbështesin kandidaturën e pavarur për kryetar komune të z. Fatmir Rashiti i cili shkoi në balotazh me PANistët. Duke parë që PANistët tashmë ishin shndërruar në një makineri që kokën e kishte nivelin qendror, kjo iniciativë e barti betejën duke mbështetur kandidaturën e z. Fatmir Rashiti për deputet dhe Lëvizjen VETËVENDOSJE! në zgjedhjet e 6 tetorit”, ka shkruar Kurti.
“Pas fitores së Lëvizjes VETËVENDOSJE! dhe me PANistët në opozitë, u hapën mundësitë për ndryshime dhe kjo po bëhet e dukshme ende pa u certifikuar rezultatet. Qytetarët, intelektualët, profesionistët, talentet dhe të gjithë ata që në një mënyrë ose tjetër kanë ndihmuar që ky ndryshim të vijë në shprehje e kanë të qartë që duhet shumë punë për ta kthyer vendin në binarët e drejtësisë dhe zhvillimit ekonomik, andaj edhe po shprehën të gatshëm të kontribuojnë që ndryshimi të jetë sa më i plotë. Në këtë frymë na u bashkua Iniciativa Qytetare e Shtimës sot, që në radhët e veta numëron intelektualë e profesionistë të shquar të asaj komune e të këtij vendi”.
Më tej Kurti ka thënë se “Fatmir Rashiti ka punuar në arsim deri në vitin 2002. Nga ajo kohë ai filloi të angazhohet edhe politikisht duke shërbyer si nënkryetar i Komunës së Shtimes deri në vitin 2004, prej ku më pas emërohet Kryetar i Kuvendit Komunal të Shtimes deri në vitin 2007. Nga ky vit, kur edhe ishte anëtari më i votuar në radhët e PDK-së, ai rikthehet si nënkryetar i komunës për tri mandate me radhë deri në vitin 2017 kur edhe jep dorëheqje nga PDK-ja për shkak të keqqeverisjes. Në zgjedhjet e vitit 2017 ai i hyri garës për Komunën e Shtimes si kandidat i pavarur dhe arriti të shkoj në balotazh me PAN-in”.
Ai ka përmendur edhe anëtarët e tjerë të se Iniciativës Qytetare të Shtimes që i janë bashkuar Lëvizjes Vetëvendosje. /Telegrafi/
