Ministri i Mbrojtjes, Armend Mehaj ka pritur në një takim ministren e Arsmit, Arbërie Nagavci dhe ministrin e Kulturës, Rinisë dhe Sportit, Hajrullah Çeku.
Mehaj ka bërë të ditur se në takim kanë diskutuar rreth iniciativës për futjen e lëndës së Sigurisë në planprogramin shkollor, transmeton Telegrafi.
“Njohuritë themelore për sigurinë për nxënësit dhe studentët tanë – të dobishme në të gjitha dimensionet shoqërore. Sot prita në takim, ministren e Arsimit, Shkencës, Teknologjisë dhe Inovacionit, Arbërie Nagavci dhe Ministrin e Kulturës, Rinisë dhe Sportit, Hajrullah Çeku, për të diskutuar rreth iniciativës sonë për futjen e lëndës së Sigurisë në planprogramin shkollor të mesëm dhe të lartë të vendit”, ka thënë Mehaj.
Ai ka shtuar tutje se “ofrimi i njohurive themelore për sigurinë për nxënësit dhe studentët tanë u vlerësua i domosdoshëm në realitetin e sotëm, si dhe shumë i dobishëm në kompleksitetin e kërcënimeve dhe rreziqeve në mjedisin e sigurisë së përgjithshme”.
“Kosova ka pasurinë e saj unike në Botë – Rininë e shëndoshë e cila ka nevojë dhe do të mësoj si të reagoj për vete, familjen, fqinjin, shokun, komunitetin, rrethin, vendbanimin, shoqërinë dhe Atdheun e vet në rast aksidenti, fatkeqësie dhe pasigurie. Na priftë e mbara”, ka shkruar Mehaj në postimin e bërë në Facebook. /Telegrafi/
