Kryetari i Partisë së Lirisë, Ilir Meta, është paraqitur këtë të enjte në Prokurorinë e Posaçme anti-Korrupsion (SPAK).
Në hyrje të portës së SPAK, Meta sulmoi drejtuesin e Prokurorisë së Posaçme Altin Dumani.
“A njihni “Dum Dumanin” kush është? Është ai që nuk guxon të hapë çështjen McGonigal, sepse është kokë e këmbë bashkë me Edi Ramën. Dum Dumani është ai që s’guxon të përmend emrin e Edi Ramës, as për çështjen e Sali Berishës. Unë po shkoj te Dum Dumani”, tha Meta.
Kreu i Partisë së Lirisë ka shkuar i vetëm në dyert e SPAK, ku pritet të merret në pyetje nga organi i akuzës.
Meta paraqitet në Prokurorinë e Posaçme një ditë pas bashkëshortes së tij Monika Kryemadhi, e cila u pyet për rreth 5-orë në lidhje me hetimin pasuror e nisur nga SPAK.
Ende nuk dihet çështja për të cilën kreu i PL është thirrur për t’u marrë në pyetje. /Telegrafi/
