Mbrëmë rreth orës 22:00 është arritur të bëhet identifikimi i personit që humbi jetën si pasojë e goditjes nga një makinë e tipit ‘Golf 4’, me targa vendore KS, në Rrugën ‘Eliot Engel’, tek Shtëpia e Mallrave në Pejë.
Viktima, siç raporton një portal nga Peja, është Kahreman Shoshi nga Peja i moshës mbi 75 vjeçare dhe është identifikuar nga familjarët e tij, përderisa ka qëndruar në Spitalin Rajonal të Pejës.
Në momentin kritik, viktima nuk ka pasur me vete asnjë dokumentacion personal dhe kjo e kishte vështirësuar identifikimin nga ana e organeve policore dhe të trafikut.
Ngjarja e rëndë kishte ndodhur mbrëmë rreth orës 20:45 minuta.
Kahreman Shoshi
“Me urdhër të prokurorit të shtetit, ngasësi i automjetit, tani, në cilësinë e të dyshuarit, me inicialet F.N. i vitit të lindjes më 1998, është arrestuar dhe është dërguar në ndalim policor”, ka njoftuar Policia rajonale e Pejës.
Trupi i pajetë i viktimës është dërguar në Institutin e Mjekësisë Ligjore në Prishtinë për obduksion. /Telegrafi/