Kanë mbetur edhe dy ditë nga derbi i Milanos dhe vëmendja e botës së futbollit pritet të jetë në këtë ndeshje që zhvillohet me 17 tetor.
Edhe pse do të luhet pa praninë e publikut të mrekullueshëm që ka mbushur gjithmonë shkallët e stadiumit ‘San Siro”, ndjenjat për këtë ndeshje mbesin të mëdha.
Një nga personat më nostalgjikë për derbin e Milanos është edhe ish kapiteni i Interit, Mauro Icardi, i cili sot ka sjellë në kujtesë tre golat që shënonte tash e tri vite më parë, kur fituan 3-2.
“Kemi qenë ajo që nuk tregohet, por që kurrë nuk harrohet”, ka shkruar sulmuesi në Instagramin e tij, duke postuar edhe foton e festimit të njërit prej tre golave të shënuar mbrëmjen e 15 tetorit të vitit 2017.
Icardi në atë kohë mbante edhe shiritin e kapitenit të Interit në krahun e tij.
Tani argjentinasi është pjesë e francezëve të PSG-së, por nuk e ka harruar asnjëherë klubin ku edhe luajti për herë të parë në nivele të larta. /Telegrafi/