Kryeministri hungarez, Viktor Orban tha se vendimi i Gjykatës Evropiane të Drejtësisë për të ndëshkuar Hungarinë për moszbatimin e politikës së përbashkët të bllokut evropian ndaj azilkërkuesve është i pabesueshëm dhe i papranueshëm.
“Vendimi i Gjykatës Evropiane të Drejtësisë për të gjobitur Hungarinë me 200 milionë euro plus një milion euro në ditë për mbrojtjen e kufijve të BE-së është i egër dhe i papranueshëm. Emigrantët e paligjshëm duket se janë më të rëndësishëm për burokratët e Brukselit sesa qytetarët e tyre evropianë”, Orban ka shkruar në platformën “X”.
Dje, Gjykata e Drejtësisë e BE-së shpalli vendimin për dënimin e shtetit hungarez me 200 milionë euro për shkak se nuk zbaton politikën e përbashkët të bllokut europian ndaj azilkërkuesve.
The #ECJ’s decision to fine #Hungary with 200M euros plus 1M euros daily(!!!) for defending the borders of the European Union is outrageous and unacceptable. It seems that illegal #migrants are more important to the Brussels bureaucrats than their own European citizens.
— Orbán Viktor (@PM_ViktorOrban) June 13, 2024
“Hungaria është urdhëruar të paguajë një shumë të madhe prej 200 milionë euro dhe një gjobë prej 1 milionë euro në ditë vonesë për moszbatim të vendimit të Gjykatës së Drejtësisë. Ky dështim, që konsiston në shmangien e qëllimshme të aplikimit të politikës së përbashkët të BE-së në tërësi, paraqet një shkelje të paprecedentë dhe jashtëzakonisht të rëndë të ligjit të BE-së”, thuhet në deklaratën e gjykatës.
Zëdhënësja e Komisionit Evropian për Punë të Brendshme dhe Migrim, Anita Hipper, tha se Komisioni e ka marrë parasysh vendimin e gjykatës dhe se pret që Hungaria ta respektojë atë vendim.
“Komisioni do të kontaktojë me Hungarinë për të pyetur për masat që synon të marrë për të përmbushur verdiktin e sotëm”, tha Hipper në konferencën e përditshme në Bruksel.
Zëdhënësi i Komisionit Evropian, Balazs Ujvari, tha se Komisioni do të kërkojë para nga Hungaria në intervale të caktuara, në të kundërtën Komisioni do ta zbresë shumën e specifikuar nga alokimet buxhetore të BE-së për atë vend. /Telegrafi/