Spanjolli i huazuar te Arsenali ka luajtur pak më shumë se një orë e gjysmë për skuadrën e drejtuar nga Unai Emery.
Denis Suarez ka kaluar në radhët e Arsenal në formë huazimi nga Barcelona dhe po tregohet mjaft i kushtueshëm për bordin e Gunners.
Që nga ardhja në afatin kalimtar të janarit, 25-vjeçari ka luajtur vetëm 95 minuta në të gjitha garat dhe nuk ka arritur të jetë startues në asnjë ndeshje të vetme për klubin londinez.
Mesfushori ishte në stol në fitoren 2:0 kundër Newcastle Unitedit dhe nuk arriti të futet në fushë, që do të thotë se deri më tani çdo minutë të kaluar te Topçinjtë i ka kushtuar Arsenalit 32,700 euro, sipas llogaritjeve të bëra nga e përditshmja britanike “The Times”.
Anëtari i Ligës Premier ka paguar 2.67 milionë euro, ku për shërbimet e lojtarit Barcelonës i detyrohet 2.17 milionë euro ndërsa për këtë periudhë futbollisti do të paguhet 600 mijë euro.
Suarez është paraqitur për 67 minuta në Ligën Premier dhe 28 në Ligën e Evropës kundër BATE Borisovit dhe ende nuk ka shënuar apo asistuar për Arsenalin, i cili do të përballet me Evertonin në Goodison të dielën. /Telegrafi/