Ish-kryeministri i Kosovës, Avdullah Hoti thotë se qeveritë e kaluara kanë bërë punë të mëdha, ndërsa, deklarimet e Qeverisë Kurti se po “iu del punë për t’i korrigjuar dëmet e ish-qeverive”, po i quan deklarime të kota dhe pa asnjë vlerë.
Deputeti i LDK-së, Avdullah Hoti theksoi se nëse ka guxim kryeministri, Albin Kurti le t’i anulojë marrëveshjet e kaluara.
“E ka shumicën e në Kuvendin e Kosovës. Mund t’i sjell të gjitha ato marrëveshje që i paskan bërë qeveritë paraprake dhe t’i anulojë ato marrëveshje. Le t’i anulojë nëse ka guxim dhe le ta përmbyll atë çështje dhe përmbyllet ky debat. Por është vetëm deklarim i kotë”, tha Hoti në RTV21, përcjell Telegrafi.
Hoti tha se Qeveria e udhëhequr nga Albin Kurti nuk është transparente lidhur me takimet në Bruksel.
Ai tha se e kanë pritur në seancë që të prezantohet platforma siç kanë bërë të gjithë kryeministrat më përpara në proces të dialogut.
Tutje Hoti ka shpjeguar se si ka vepruar ai para se t’ia niste procesit të dialogut në kohën kur ishte kryeministër.
