Kryeministri i Kosovës, Avdullah Hoti ka nisur raportimin e tij në Kuvendin e Kosovës, lidhur me procesin e dialogut me Serbinë.
Hoti ka thënë se dialogu Kosovë –Serbi ka rifilluar pas 20 muajsh, teksa ka ripërsëritur se nuk do të ketë dialog teknik, transmeton Telegrafi.
“Detyrimi për përfaqësimin tim në dialog buron nga kushtetuta. E para integriteti territorial i Kosovës është i pacenueshëm, Tërësia e territorit të Kosovës është premisa thelbësore e Republikës së Kosovës, Organizimi kushtetues i Kosovës nuk mund të preket sepse si i tillë garanton organizimin e pushteteve, Marrëveshja me Serbinë do të jetë në përputhje me Kushtetutën”, u shpreh Hoti gjatë raportimit të tij.
Kryeministri ka thënë se në dialog nuk do të bisedohet për integritetin territorial të Kosovës.
“Dua ta konfirmoj edhe një herë se për Qeverinë e Kosovës dhe për mua si kryeministër nuk ka dhe nuk do të ketë dialog teknik. Të gjitha takimet në ditët në vijim do të jenë vetëm për draftimin e marrëveshjes finale për njohje reciproke dhe normalizim të marrëdhënieve mes dy vendeve.
Unë e kam përgjegjësinë në këtë proces, unë do ju mbajë të informuar gjatë gjithë kohës për çdo gjë dhe do të jem llogaridhënës. Por, unë nuk do të rri duarkryq dhe as nuk do te qahem para jush, për teori konspirative me harta e thika për ndarje të territorit. Do t’i ushtrojë autorizimet mija kushtetuese pa interferim nga askush”, ka thënë Hoti.
Kryeministri ka thënë se për një muaj qeverisje kanë kthyer Kosovën pranë miqve të tyre, SHBA-së dhe Bashkimit Evropian./Telegrafi/