Shefi i grupit parlamentar të LDK-së, Avdullah Hoti i ka quajtur mashtrime elektorale premtimet e koalicionit PAN gjatë fushatës, që arsimtarëve t’u rriten pagat për 30%.
Në një postim në rrjetin social facebook, Hoti ka thënë se kërkesat e SBASHK-ut duhet të merren parasysh, pasi sipas tij, ata po kërkojnë trajtim të barabartë në strukturën e pagave.
“Dikur koalicioni i ‘punëve të mëdha’ kërkonte votat e arsimtarëve, duke iu garantuar 30% rritje të pagave. Tani me arrogancë u kërkojnë ndërprerjen e grevës. Mashtrimet elektorale kanë dalë sheshit. Kërkesat e SBASHK-ut duhet të merren në konsideratë, pasi nuk po kërkojnë rritje të pagës, por trajtim të barabartë në strukturën e pagave në sektorin publik”, ka shkruar Hoti në facebook.
Shefi i deputetëve të LDK-së ka thënë se zgjidhja është duke anuluar vendimin e qeverisë, për dyfishimin e pagave.
Ai gjithashtu ka kërkuar që Ligji për paga të tërhiqet dhe rishkruhet në konsultim me të gjithë sektorët.
“Zgjidhja është e thjeshtë: Qeveria të anulojë vendimin për dyfishimin e pagës për vete, Projektligji i pagave të tërhiqet dhe të rishkruhet në konsultim me arsimtarët, mjekët, shërbyesit civil, policinë, zjarrfikësit, doganierët, inspektorët tatimorë, komunat dhe sektorët e tjerë”, përfundon postimi i Hotit në facebook.
Ndryshe, greva e Sindikatës së Bashkuar për Arsim, Shkencë dhe Kulturë tashmë ka hyrë në javën e dytë. /Telegrafi/