Grupi militant libanez Hezbollah ka lëshuar “raketa të rënda luftarake” drejt qyteteve në veri të Izraelit, në shenjë “hakmarrjeje” kundër valës së fundit të sulmeve ajrore izraelite që vranë nëntë anëtarë të grupit.
Që nga shpërthimi i luftës midis Izraelit dhe Hamasit, shqetësimet janë rritur gjithnjë e më shumë se përleshjet ditore midis Izraelit dhe Libanit mund të përshkallëzohen në një sulm më të gjerë.
Bëhet e ditur se rritja e dhunës në territoret e Lindjes së Mesme ka ngritur alarmin edhe në Uashington dhe në Kombet e Bashkuara, shkruan yahoonews, përcjell Telegrafi.
“Rivendosja e qetësisë përgjatë atij kufiri mbetet prioriteti kryesor për presidentin (Joe) Biden dhe administratën e tij”, tha zëdhënësi i Sigurisë Kombëtare të Shtëpisë së Bardhë, John Kirby, duke theksuar se SHBA-ja po punon për të ndaluar luftimet përmes përpjekjeve diplomatike.
Ndryshe, në sulmet e fundit Hezbollahu ka përdorur raketa portative antitank Kornet të prodhimit rus, raketa Burkan dhe ka deklaruar se sulmet e tij do të ndalen vetëm kur Izraeli do të ndalojë ofensivën në Gazë.
Që “ky përshkallëzim është i domosdoshëm të ndërpritet menjëherë”, thanë edhe forcat paqeruajtëse të OKB-së në Libanin Jugor (UNIFIL).
Kjo pasi numri i viktimave në ato zona vetëm sa vazhdon e rritet.
Edhe pse nga sulmet e fundit nuk raportohet për të lënduar, nga luftimet midis Izraelit dhe Hezbollahut deri më tash kanë mbetur të vrarë nëntë civilë dhe 11 ushtarë izraelit, ndërsa në Liban kanë vdekur më shumë se 240 luftëtarë të Hezbollahut dhe rreth 50 civilë. /Telegrafi/