Helikopterët luftarakë të ushtrisë ukrainase kanë filmuar nga brendësia e kabinave, duke kryer sulme ajrore me raketa mbi pozicionet e ushtrisë ruse.
Në videon e publikuar nga Ministria e Mbrojtjes e Ukrainës, shihen helikopterët duke fluturuar ulët dhe vazhdimisht duke shkrepur predha në drejtim të mjeteve të blinduara të ushtrisë ruse, transmeton Telegrafi.
Videoja është realizuar nga kabinat e helikopterëve ukrainas, të cilët sipas Shtabit të Përgjithshëm kanë arritur t’i shkaktojnë humbje të mëdha forcave të armikut.
Në anën tjetër, presidenti ukrainas Volodymyr Zelensky, ka bërë të ditur se me marrjen e sistemeve raketore amerikane Patriot, do të arrijnë të mbrojnë më shumë infrastrukturën e tyre energjetike që vazhdimisht po bombardohet nga rusët.
E kjo ka bërë që mbi 9 milionë ukrainas të mbesin pa energji elektrike në ditët e ftohta të dimrit, ku gjithashtu po u mungon ngrohja e uji i pijshëm. /Telegrafi/
