Në takimin ndërmjet grupeve punuese të Lëvizjes Vetëvendosje dhe Lidhjes Demokratike të Kosovës janë mbyllur të gjitha çështjeve të cilat kanë mbetur të hapura për programin qeverisës.
Lutfi Haziri nga LDK ka thënë se me këto takime kanë ndërruar standardin e formimit të koalicioneve.
“Sot kemi arritur me i përmbyllë politikat sociale, çështjet që lidhen me draft kornizen e marrëveshjes së koalicionit të pritur mes LDK-së e LVV-së. Ka qenë një punë e jashtëzakonshme e ekipeve punuese. Kemi ndërruar standardin e koalicioneve, kulturën e ndërtimit nga e kaluara, sepse po punojmë në ndërtimin e themeleve të bashkëpunimit. Ideja është që të përafrojmë dy partitë kryesore, dhe të definojmë çështjet që lidhen me politika zhvillimore, politika të kthimit të shpresës që është e dëmtuar nga e kaluara”, ka thënë ai, përcjell Telegrafi.
Haziri ka folur edhe për ndarjen e përgjegjësive ku ka thënë se kjo do të vendoset në takim të kryetrarëve të partive.
“Ndarja e përgjegjësiove, struktura e qeverisë janë çështje që do të diskutohen në takimin e kryetarëve. Janë çështje që janë përfshirë në draft kornizën e marrëveshjes. Janë çështje të dy anshme dhe natyrisht që është njëra prej pjesëve të punës sona, por më e rëndësishmja për LDK-në janë politikat sektoriale, programi qeverisës, parimet kryesore në vendosjen e dialogut, raportet me Serbinë, politikat integruese në BE dhe NATO. Pjesa e dytë e punës besoj që është hap që do të byllet pa asnjë problem. Të gjitha çështjet që lidhen me strukturën qeverisëse me 12 ministra me një zëvendëskryeministër dhe me ndarje të detyrave kushtetuese, janë çështje që do të zgjidhen nga lidereët”, është shprehur ai.
I pyetur se a do të jetë Lista Serbe në Qeveri, ai tha se do të jetë një ministër nga Lista Serbe dhe një nga minoritetet pakicë.
“Lidhur me minoritetet ne do t’i zbatojmë të gjitha obligimet kushtetuese. Do të diskutohet me të gjitha partitë e minoriteteve, i mandatuari për kryeministër do ta merr atë detyrë. LDK dhe LVV e bëjnë shumicën parlamentare, besojmë se do të ketë qeverisje të qëndrueshme. Lista Serbe se çfarë statusi do të ketë në Kuvend, është çështje që është vendos tashmë. Ata do të përfaqësojnë minoritetet shumicë pra komunitetin serb në Kuvend. Do të ketë ministër serb në Qeveri dhe do të ketë ministër të pakicave që vijnë nga komunitetet tjera që të integrohen të gjitha forcat politike. Ndërsa lidhur me çështjen e Presidentit, nuk është çështje që na dallon. Është tejkaluar. Por kjo do të diskutohet në takim me kryetarët”, ka deklaruar ai./Telegrafi/