Eden Hazard si duket ka vendosur që t’i qëndrojë besnik skuadrës së tij aktuale Chelsea.
Mesfushori belg po futet në vitin e tij të gjashtë në Chelsea që nga transferimi në vitin 2012 nga skuadra franceze Lille.
Është duke kaluar nëpër një formë të mrekullueshme dhe për të interesim ka shprehur kampioni aktual i Evropës, Real Madrid.
26-vjeçari më në fund ka folur për interesimin e Realit, por të njëjtën kohë ai i ka mbyllur dyert madrilenëve.
“Real Madridi është një skuadër e madhe dhe Zidane është idhulli im, por vetëm kaq, asgjë më shumë”, ka thënë hazard.
“Nuk largohem nga Chelsea, jam i lumtur këtu. Trajneri dhe tifozët besojnë në mua dhe kjo është gjëja kryesore”, ka thënë mesfushori anësorë.
Reprezentuesi belg ka thënë se të ardhmes nuk i dihet pasi nuk është një parashikues, por momentalisht nuk e mendon largimin.
“Unë nuk jam parashikues për ta ditur të ardhmen. Gjithçka mund të ndodhë pasi situata brenda klubit mund të ndryshojë, por aktualisht nuk e mendoj largimin nga Chelsea”, ka thënë Hazard.
“Momentalisht jam i fokusuar vetëm në sezonin aktual me klubin dhe në kontratën e re e cila pritet të vazhdohet sa më shpejtë”, përfundoi Hazard.
Në 20 ndeshje në të gjitha garat, Hazard këtë edicion ka realizuar tetë gola dhe ka dhuruar shtatë asistime për Chelsean.
Kontrata aktuale e tij me Chelsean skadon në vitin 2020, por kampionët e Anglisë i kanë përgatitur një kontratë të re ku belgu do të bëhet lojtari më i paguar në Ligën Premier. /Telegrafi/