Ministrja e Drejtësisë, Albulena Haxhiu, ka thënë se është shqetësuese se si ish i burgosuri Faton Hajrizi, po merr epitetin e heroit.
Në një konferencë për media pas intervistimit nga Prokuroria Speciale e Kosovës, Haxhiu ka deklaruar se ka marrë kërcënime pas qëndrimeve të saja për të ndjerin.
“Për mua është shqetësuese dhe vlerat që po tentohet t’i humbim si shoqëri. Nuk mund ta quajmë hero një person që ka vepra të rënda, i cili ka plagosur policë të Kosovës, i cili është dënuar për vepra të rënda penale. Dhe pas reagimit dhe qasjes time që kam pasë natyrisht se kam pasë kërcënime nga individë të ndryshëm. Vlerësimi i rrezikshmërisë do të bëhet së shpejti, por për të shmangur çfarëdo situate natyrisht që e kemi pa të rëndësishme që të ketë mbrojtje”, tha ministrja Haxhiu.
Haxhiu gjithashtu sugjeroi se “mund të konsiderohet riautopsia e trupit të Faton Hajrizit”, ndërsa shtoi se “dje është thënë që përputhen gjurmët e gishtërinjve, por na duhen më shumë informata”. /Telegrafi/