Antoine Griezmann e ka komentuar ndeshjen e të martës mbrëma ndaj Villarrealit, në të cilën shënoi një gol.
Barcelona fitoi me vështirësi (2-1), ndërsa Lionel Messi, i cili e nisi takimin nga minuta e parë, u detyrua ta lëshonte fushën për shkak të lëndimit.
Ishte pikërisht superylli argjentinas, ai që asistoi te goli i francezit, ndërsa ky i fundit e ka komentuar partneritetin me të në sulm, si edhe lëndimin.
Dy lojtarët bënë paraqitje të mirë në formacionin 4-3-3 dhe Griezmann e ka bërë të qartë se ai ka nisur të përshtatet te klubi i ri dhe kuptohet mirë me yllin kryesor të skuadrës.
“Në fund, Leo e dërgon topin aty ku dëshiron dhe me të, të gjithë i kanë pozitat e tyre”, ka deklaruar Griezmann për Moviestar pas ndeshjes.
“Ai pati dhimbje. Nuk e di (çfarë ndodhi saktësisht) sepse nuk e kam pasur rastin të flas me të dhe trajneri na jepte instruksione taktike”, ka shtuar më tej ish-sulmuesi i Atletico Madridit. /Telegrafi/
