Që kur presidenti rus Vladimir Putin shpalli mobilizimin e pjesshëm, shumë rusë kanë ikur duke shkuar matanë kufirit në shtetet fqinje.
Pa pajisje adekuate ushtarake, mungesë të ushqimit dhe ujit, nganjëherë edhe pa këpucë, ushtarët e rekrutuar dëshmojnë për tmerrin në fushëbetejë, e shumë prej tyre deri më tani kanë dezertuar e nëse kthehen i pret burgu apo edhe më keq, transmeton Telegrafi.
Media e pavarur ruse Novaya Gazeta, ka folur me gratë e tre burrave të mobilizuar në brigadën e 423-të të motorizuar të Gardës së Moskës.
Burrat e tyre tani po përballen me gjyqe ushtarake për dezertim, pasi u vendosën në Ukrainë muajin e kaluar.
Trajnimi i burrave thuhet se konsiston me hapjen e istikameve për dy javë nëpër kampe në pyjet e rajonit Belgorod të Rusisë, para se të transferoheshin në rajonin e Luhanskut.
Rekrutët dyshohet se komandoheshin nga dy gjeneralë të sapomobilizuar, asnjëri prej tyre nuk kishte përvojë luftarake.
Pasi ishin vendosur në vijën e parë të frontit, ushtarët nuk kanë kontaktuar më me gratë e tyre deri më 26 tetor, e kur i kontaktuan kishin lutje për ndihmë.
Njëra prej tyre, gruaja e një rekruti 24-vjeçar, tha se njësia e bashkëshortit të saj është granatuar për 12 orë, ku gjatë kësaj kohe njëri nga komandantët është “hedhur në erë”.
E komandanti tjetër që i mbijetoi sulmit kishte urdhëruar tërheqjen e trupave, por nga nivelet e larta të komandës erdhi urdhri për t’u kthyer në front.
“Pasi që refuzuan të kthehen, atyre iu ofruan pajisje të reja, jelek antiplumb, helmeta apo i priste opsioni i fundit, gjyqi ushtarak”, tha gruaja e ushtarit që u identifikua si Irina, me qëllim që të mbrojë identitetin e saj të vërtetë.
Ajo shtoi se burri i saj, së bashku me 26 të mbijetuar të tjerë nga njësia e tij, po fshihen në një shtëpi të braktisur.
“Llogaritë e tyre bankare janë bllokuar, nuk kanë mjete për të mbijetuar, janë pa para, ushqim e ujë. Burri im më tha se nuk ka ngrënë për disa ditë dhe se nuk e dimë si do t’i ndihmojmë”, shtoi Irina.
Një grua tjetër e quajtur Ekaterina, tha se burri i saj 27-vjeçar kishte kryer trajnime të ngjashme, pra vetëm për hapjen e istikameve.
Ai dyshohet se është dërguar në një vend në Ukrainë, ku 76 burra rusë u vranë nga granatimet rreth dy javë para mbërritjes së tij. Ekaterina thotë së bashkëshorti i saj dhe shokët e tij kanë gjetur veten mes zjarrit.
“Për disa orë qëndruan të shtrirë në tokë duke u shtirur kinse kanë vdekur – nuk kanë pasur më armë përveç një mitralozi. Mbi kokat e tyre fluturonin predha dhe vëzhgoheshin nga dronët që mungonte një lëvizje e gishtit që droni t’ua hedhë një predhë”, shtoi ajo. /Telegrafi/