Granit Xhaka këmbëngul se lojtarët e Arsenalit nuk po luajnë lojën e fajit në lidhje me Bukayo Sakan, shkaku i penalltisë së humur nga ky i fundit në ndeshjen ndaj West Ham United dhe paralajmëroi Manchester Cityn se nuk është e sigurt asgjë për ta.
Topçinjtë përballen me Southamptonin në shtëpi pas dy barazimeve të fundit, për më shumë kur kishin epërsinë prej dy golash (ndaj Liverpoolit dhe West Hamit).
Por, pavarësisht lëshimit të pikëve në garën kundër skuadrës së Pep Guardiolës, Xhaka është i bindur se lojtarët janë gati për të ecur përpara.
“Nuk kemi nevojë të fajësojmë askënd, as Bukayon, as ndonjë lojtar tjetër”, deklaroi mesfushori shqiptar me pasaportë zvicerane. “Dua të them, sigurisht që ai humbi penalltinë. Por, kjo i ndodh jo vetëm atij, por edhe lojtarëve më të mëdhenj se ai”.
“Ky djalë është kaq i ri, ai është 21. Por, ai është aq i fortë mendërisht. Ne nuk jemi të shqetësuar për të. Sigurisht, ai ishte shumë i zhgënjyer, si gjithë skuadra”.
“Ne kemi edhe 10 lojtarë të tjerë në fushë. Ai ka nevojë për mbështetjen tonë ndoshta më shumë tani se më parë. Ai është i ri dhe kjo është një përvojë më shumë për të ardhmen e tij. Por, unë mendoj se ai është aq i fortë mendërisht sa do të rikthehet dhe do ta tregojë të premten”, ka shtuar më tej Xhaka.
Mesfushori deklaroi më tej se ndaj Southamptonit ata presin një lojë të vështirë, por që do të tentojnë me të gjitha forcat t’i mposhtin. /Telegrafi/