Roja bregdetare italiane bllokoi një gomone me rreth 400 kilogramë marihuanë duke arrestuar dy trafikantët shqiptarë që ndodheshin në bord.
Sipas burimeve zyrtare italiane, operacioni i zhvilluar në brigjet e Leçes u mbështet nga mjetet ajrore dhe Roja Bregdetare Evropiane.
Sipas policisë italiane trafikantët shqiptarë u ndoqën në det nga mjetet e lundrimit dhe nga ajri, me gomonen super të shpejtë rreth 6 metër të gjatë dhe u detyruan të ankoroheshin në Portin e Otrantos.
Policia italiane tha se nëse droga do të shpërndahej në tregun kriminal rrjetet e trafikut do të përfitonin mbi 4 milionë euro.
Sipas të dhënave policore italiane vetëm këtë vit në këtë hapësirë detare janë bllokuar rreth 3 tonë marihuanë dhe janë arrestuar 70 persona për trafik ndërkombëtar të drogës.
Italia është destinacioni kryesor i marihuanës që kultivohet në Shqipëri ndërsa sasi të mëdha marijuane transportohen edhe drejt kufirit tokësor grek.
Policia shqiptare tha sot se arriti në 13 numri i personave të arrestuar një ditë më parë për trafik droge me Greqinë, ndërkohë që pak ditë më parë po për këtë aktivitet kriminal u arrestuan edhe 14 persona të tjerë.