Trajneri Gianni De Biasi as nuk e ka mohuar as pohuar prejardhjen e tij arbëreshe.
Ish-trajneri i kombëtares shqiptare të futbollit, Gianni De Biasi, ishte i ftuar në emisionin “Soiree”, në Top Channel.
Gjatë një bisede me gazetarin Marin Mema, teksa flitej për patriotizmin dhe atdhedashurinë në Ditën e Pavarësisë, ky i fundit zbuloi një detaj mjaft interesant nga jeta e De Biasit.
Marin Mema tregoi për publikun se rreth 44 kilometra larg Pescaras, në Italinë qendrore, ka gjetur arbëreshë me mbiemrin De Biasi.
Këtë fakt, ish-trajneri nuk e ka mohuar, por e ka lënë çështje të hapur, pasi nuk ka informacion.
Por, më pas, u shpreh duke qeshur: “E dija që isha shqiptar”.
Ndryshe, De Biasi është trajneri i cili bëri ëndrrën realitet që Shqipëria të kualifikohet në një kampionat evropian apo botëror.
Kjo pasi Shqipëria ishte pjesë e ‘Euro 2016’ të mbajtur në Francë.