Futbollisti holandez, Quincy Promes është dënuar me 18 muaj burg për sulm ndaj kushëririt të tij.
31-vjeçari, i cili tani luan për Spartak Moskën, e goditi viktimën me thikë në gju gjatë një feste familjare në Abcoude në korrik 2020.
Promes u shpall fajtor për sulm të rëndë nga një gjykatë holandeze, por pasi ai aktualisht ndodhet në Rusi është e paqartë nëse ai tani do të kthehet në Holandë.
Ai gjithashtu është urdhëruar t’i paguajë viktimës 7000 euro si kompensim.
Sulmi doli në dritë për shkak se telefoni i Promes ishte përgjuar në një hetim për trafik droge.
Promes gjithashtu do të dalë në gjyq më vonë këtë vit për dy ngarkesa kokaine, gjithsej 1362 kilogramë, nëpërmjet portit të Antwerp.
Promes, i cili gjithashtu ka luajtur për skuadrën spanjolle Sevilla, ka 50 ndeshje me Kombëtaren e Holandës. /Telegrafi/