Portali Telegrafi.com apo më saktë redaksia e sportit ka përpiluar një formacion me lojtarët më të mirë të raundit të dytë të ndeshjeve të grupeve në Kampionatin Botëror “Katar 2022”.
Kampionati Botëror në Katar nisi me 19 nëntor dhe më 28 nëntor (e hënë) u mbyllen ndeshjet e dyta të fazës së grupeve.
Shumica e ndeshjeve përfunduan ashtu siç janë pritur, por pati edhe befasi sikurse që ishte fitorja e Marokut ndaj Belgjikës dhe ajo e Iranit ndaj Uellsit.
Franca, Argjentina, Brazili, Portugalia dhe Kroacia morën fitore të pritura, edhe pse disa nga to ishin të vuajtura dhe një gol diferencë.
We've already had HALF of the games at #Qatar2022 🤯
What was your favourite moment from matchweek two?
— FIFA World Cup (@FIFAWorldCup) November 28, 2022
Por, kush ishin më meritorët dhe lojtarët më të dalluar gjatë ndeshjeve të dyta të grupeve në Katar?
Telegrafi Sport ka përpiluar një formacion me lojtarët më të mirë të këtij raundi, në bazë të paraqitjeve dhe statistikave dhe i ka vendosur në një rreshtim 4-3-3.
Në portë është portieri i Polonisë, Wojciech Szczesny, që bëri pritje të mëdha, prej tyre edhe një penallti në fitoren e ekipit të tij ndaj Arabisë Saudite.
Mbrojtja me katër ka emra si Ramin Rezaeian i Iranit, që pati paraqitje të madhe ndaj Uellsit, ku edhe shënoi gol. Në qendër janë Romain Saiss i Marokut që shënoi ndaj Belgjikës dhe Harry Souttar i Australisë që kishin paraqitje të shkëlqyer ndaj Tunizisë. Në të majtë ishte i palodhuri i Spanjës ndaj Gjermanisë, Jordi Alba, i cili madje shtoi edhe një asistim.
Mesfusha vjen me tre, ku në qendër të saj është Casemiro i Brazilit, që përveç paraqitjes së mirë ndaj Zvicrës e shënoi edhe golin e fitores. Para tij është Mohammed Kudus, i cili edhe pse po luan te Gana më i tërhequr shkëlqeu ndaj Koresë së Jugut me dy gola në fitoren prej 3-2. Në krahë me ganezin është ylli i Portugalisë, Bruno Fernandes, i cili ndaj Uruguait shënoi dy herë në fitoren e skuadrës së tij. Ai ishte lider në fushë gjatë 90 minutave.
Sulmi vjen me tre, ku në krahun e djathtë është Vincent Aboubakar i Kamerunit, që e nisi nga banka ndaj Serbisë, por me të futur shënoi dhe asistoi për barazimin 3-3. Në qendër është Lionel Messi që ndaj Meksikës luajti në të gjitha pozitat e sulmit, ndërsa shënoi dhe asisitoi në fitoren 2-0. Një paraqitje briliante e argjentinasit. Në krahun e majtë është ylli i Francës, Kylian Mbappe, që shënoi dy herë ndaj Danimarkës, ndërsa ishte rrezik konstant për mbrojtjen daneze.
Ndeshjet e treta të grupeve për “Katar 2022” kanë filluar gjatë ditës së sotme (e martë). /Telegrafi/