Forcat izraelite e kanë shtyrë inkursionin e tyre më thellë në dy zona veriore dhe jugore të Rripit të Gazës, me zyrtarët palestinezë shëndetësorë që njoftuan se bombardimet e fundit në Rafah kanë vrarë të paktën 11 njerëz.
Banorët dhe mediat e Hamasit thanë se tanket përparuan më tej në perëndim në lagjen Shakoush të Rafahut, duke detyruar mijëra njerëz të zhvendosur atje të linin kampet e tyre dhe të shkonin drejt veriut në Khan Younis.
Siç raportohet, që nga 7 maji, tanket kanë avancuar në disa rrethe të Rafahut dhe forcat kanë mbetur nën kontrollin e të gjithë vijës kufitare me Egjiptin dhe kalimin Rafah, si e vetmja portë hyrëse për shumicën e 2.3 milionë banorëve të Gazës, shkruan Reuters, përcjell Telegrafi.
“Disa familje jetojnë në zonën e bastisjes dhe tani janë të rrethuara nga forcat okupuese”, tha një banor palestinez.
“Situata atje është shumë e rrezikshme dhe shumë familje po largohen drejt Khan Younis, madje edhe nga zona Mawasi pasi gjërat u bënë të pasigurta për ta”, tha burri, i cili u zhvendos në veri gjatë natës.
Ndërkohë, më shumë se tetë muaj pas luftës ajrore dhe tokësore të Izraelit në Gaza të shkaktuar nga sulmi ndërkufitar i Hamasit më 7 tetor, krahët e armatosur të Hamasit dhe Xhihadit Islamik vazhdojnë të organizojnë sulme ndaj forcave izraelite që veprojnë në zonat mbi të cilat ushtria tha se kishte marrë kontrollin muaj më parë.
Ndryshe, përpjekjet e ndërmjetësve arabë, të mbështetura nga SHBA-ja, deri më tani kanë dështuar për të arritur një armëpushim.
Hamasi thotë se çdo marrëveshje duhet t’i japë fund luftës dhe të sjellë tërheqjen e plotë të Izraelit nga Gaza, ndërsa Izraeli thotë se do të pranojë vetëm pauza të përkohshme në luftime derisa Hamasi, i cili ka sunduar Gazën që nga viti 2007, të “shkatërrohet”. /Telegrafi/