Tyson Fury ka arritur ta mbrojë titullin e kampionit të botës WBC.
Boksieri britanik vazhdon si i pamposhtur në boksin profesionist me 32 fitore dhe vetëm një barazim.
Në stadiumin legjendar ‘Wembley’ në Londër të pranishëm ishin 94 mijë tifozë për ta parë nga afër këtë super duel, derisa miliona të tjerë e panë nga ekranet televizive.
Përveç fitores dhe mbrojtjes së titullit, Fury ka fituar edhe miliona euro nga ky meç që e fitoi ndaj Dillian Whyte.
Fury pas këtij triumfi ka fituar 26 milionë funte (31 milionë euro), derisa në anën tjetër Whyte fitoi 5,5 milionë funte (6,5 milionë euro).
Pas kësaj fitore, në stadiumin legjendar ‘Wembley’, Fury e vlerësoi lartë kundërshtarin e tij, Whyte, teksa thuri elozhe për veten dhe foli për pensionimin.
“Dillian Whyte është një luftëtar dhe besoj se do të jetë kampion bote”, ka thënë fillimisht Fury.
“Ai është i fortë si një dem dhe ka zemrën e një luani, por sonte ai u takua me një të madh në sport, një nga peshat më të rënda të të gjitha kohërave”.
“Unë mendoj se edhe Lennox Lewis do të ishte krenar për atë uppercut”.
“Jam një njeri i fjalës. Kjo mund të jetë përballja e fundit për ‘The Gypsy King’ dhe çfarë mënyrë për tu pensionuar!”, përfundoi britaniku. /Telegrafi/