Debati për më të mirin e të gjitha kohërave është gjithmonë aktiv kur luajnë Lionel Messi apo Cristiano Ronaldo, ndërsa Sergio Ramos ka luajtur me të dy superyjet e futbollit botëror.
Gjatë kohës së tij te Real Madridi, qendërmbrojtësi spanjoll pati një karrierë të jashtëzakonshme, ndërsa në kohën kur në Santiago Bernabeu ishte edhe CR7, mes tjerash, ata i fituan së bashku katër trofe të Ligës së Kampionëve dhe po aq Kupa të Botës për Klube.
Aktualisht, 36-vjeçari është në të njëjtën skuadër me ikonën tjetër të futbollit te Paris Saint-Germaini, Leo Messi, i cili në vitin e kaluar e kompletoi sirtarin e tij me Kupën e Botës.
Në ndeshjen e Kupës së Francës (të cilën PSG e humbi nga Marseille), Ramos e realizoi golin e vetëm të parisienëve duke shënuar me kokë pas harkimit të Neymar nga këndi.
Gjatë festës së golit të tij, Sergio bëri një kombinim të festimit të Messit në Botëror dhe festës së njohur të Ronaldos, ‘Siiiuuu’.
Ai fillimisht i vendosi duart pas veshëve, ashtu siç kishte bërë argjentinasi në ndeshjen çerekfinale ndaj Holandës dhe pastaj vazhdoi me festimin ikonik të CR7 duke nisur me tundjen e gishtit, për të vazhduar me kërcimin në ajër, por në vend se ta kompletonte ‘Siiiuuu’, mbrojtësi i drejtoi pastaj gishtat kah numri i tij. /Telegrafi/
Sergio Ramos’s equalizing GOAL 🇪🇸⚽️
Neymar with the assist! 🇧🇷🎯
— PSG Report (@PSG_Report) February 8, 2023
