Ka falimentuar kanali propagandistik që drejtohet nga Kremlini, RT France. Lajmin e ka konfirmuar drejtuesja e drejtuesja e këtij televizioni në Francë, Ksenia Fedorova.
Kanali kishte qenë subjekt i sanksioneve të Bashkimit Evropian që nga fillimi i agresionit ushtarak të Rusisë në Ukrainë, e që ishte bllokuar nga Qeveria e Francës në fillim të këtij viti.
“RT France do të likuidohet dhe të gjithë punëtorët do të pushohen nga puna në ditët në vijim”, tha Fedorova.
Në mars të vitit të kaluar, BE-ja ndaloi mediet shtetërore ruse, përfshirë Sputnik dhe Russia Today (RT), të transmetonin propagandën e tyre në Evropë. Sanksionet, megjithatë, nuk i penguan mediet që drejtohen nga Moska të krijojnë përmbajtje dezinformuese.
Televizioni rus i propagandës vazhdoi të krijonte, publikonte dhe transmetonte materiale, duke synuar gjithnjë e më shumë audiencën në vendet afrikane frëngjisht-folëse.
Qeveria franceze bllokoi llogaritë bankare të RT France në fillim të vitit 2023 pas vendimit të BE-së për të ngrirë asetet e kompanisë mediatike.
Propagandistët rusë njoftuan në janar 2023 se kanali kishte ndaluar transmetimin në Francë. /Telegrafi/