Presidenti turk Recep Tayyip Erdogan ka thënë se veprimet e kryeministrit izraelit Benjamin Netanyahu në lidhje me Gazën, nuk dallojnë nga ato të liderit nazist Adolf Hitler, shkruan Times of Israel.
Kjo nuk është hera e parë që Erdogan e krahason Izraelin me Gjermaninë naziste, kurse presidenti turk në qershor të vitit 2014 akuzoi Izraelin se ka “ruajtur shpirtin e Hitlerit” gjatë luftës në Gazë, transmeton Telegrafi.
Associated Press raporton se në ceremoninë e ndarjes së çmimeve në Ankara, Erdogan iu referua një videoje të shfaqur në televizionin turk që tregon ushtarët izraelitë që grumbullojnë burra gjysmë të zhveshur në një stadium të Gazës.
“I kemi parë kampet naziste izraelite në stadiume, apo jo? Çfarë është ajo? E mbani mend kur flisnin për Hitlerin në një mënyrë të çuditshme? Si ndryshoni nga Hitleri? Do të na bëjë të dëshirojmë Hitlerin. A ka diçka ndryshe në veprimet e Netanyahut në krahasim me atë të Hitlerit”, tha Erdogan.
Erdogan e ka quajtur më parë Netanyahun “kasapin e Gazës”, duke e akuzuar për veprime që përbëjnë “gjenocid” dhe ka kërkuar që ai të ndiqet penalisht nga një gjykatë ndërkombëtare për krimet e luftës.
Izraeli tërhoqi diplomatët nga Turqia në tetor, pasi Erdogan akuzoi Izraelin për kryerjen e krimeve të luftës. Turqia më vonë tërhoqi ambasadorin e saj nga Izraeli.
Izraeli ishte aleati rajonal i Turqisë për një kohë të gjatë përpara se Erdogan të vinte në pushtet, por lidhjet u përkeqësuan pas një sulmi të vitit 2010 nga komandot izraelite në Mavi Marmara të lidhur me Gazën, ku u vranë dhjetë aktivistë turq. /Telegrafi/