Një grup ekspertësh të Kombeve të Bashkuara shprehën shqetësimin e tyre sot në një letër drejtuar Rusisë, duke theksuar raportet e torturave ruse të civilëve ukrainas dhe robërve të luftës.
Sipas një deklarate të ekspertëve të OKB-së, metodat e torturës përfshijnë goditjet elektrike, vendosjen e kapuçave në kokat e viktimave dhe kryerjen e ekzekutimeve të simuluara. Taktika të tilla përdoren për të nxjerrë informacione, për të detyruar rrëfimet ose si përgjigje ndaj mbështetjes së supozuar për forcat ukrainase, raporton skynews.
Alice Jill Edwards, raportuesja speciale e OKB-së për torturën, tha se civilët ukrainas dhe të burgosurit e luftës ishin në mesin e viktimave të supozuara. Ajo shtoi se i kishte shkruar për këtë situatë Moskës.
Moska më parë ka hedhur poshtë akuzat për torturë ose keqtrajtim të të burgosurve të luftës, duke këmbëngulur se nuk synon qëllimisht civilët në Ukrainë.
Megjithëse akuzat për torturë janë ngritur më parë kundër të dyja palëve në konfliktin 15-mujor, një ekip ekspertësh të pavarur të OKB-së tha se metodat e forcave ruse mund të “sanksionohen nga shteti”.
“Përputhshmëria dhe metodat e torturës sugjerojnë një nivel koordinimi, planifikimi dhe organizimi, si dhe miratimi i drejtpërdrejtë, politika e qëllimshme ose toleranca zyrtare nga eprorët”, thuhej në letrën e dërguar nga Edwards së bashku me disa ekspertë të tjerë të pavarur.
“Bindja ndaj eprorëve nuk mund të jetë një justifikim për torturën dhe çdo person i përfshirë në aktivitete të tilla duhet të hetohet dhe ndiqet shpejt”, shtoi ajo. /Telegrafi/