Bedri Greca u rikthye në futbollin kosovar gjatë afatit kalimtar të verës, derisa pas aventurës gjashtë muajshe edicionin e kaluar te Sport Club “Gjilani”, 29 vjeçari filloi një aventurë të re te Feronikeli nga Drenasi.
Si për ironi të fatit, ndeshja e parë kampionale i solli për kundërshtarë ish-ekipin e tij, të cilën e mposhti, madje i realizoi edhe tre gola.
Greca nuk pati aspak mëshirë ndaj ish-skuadrës, teksa përveç tre golave të realizuar, krijoi edhe një mori rastesh.
Në një prononcim për Gazetën “Sheshi”, futbollisti është deklaruar për ndeshjen ndaj ish-ekipit, të cilën e quan një përballje të zakonshme kampionale dhe se ishte përgatitur si ndaj çdo kundërshtari tjetër.
Ndër të tjerash ai foli nëse golat ishin një mesazh hakmarrje për ish-skuadrën dhe ish-trajnerin Mezani
“Ndjehem mjaft mirë që shënova, por më shumë ndjehem mirë për skuadrën, pasi që treguam se jemi në rrugën e duhur. Asgjë nuk ishte rastësi, çdo gjë ishte e stërvitur mirë dhe e punuar në perfeksion”, deklaroi fillimisht Greca.
“Unë jam i përqendruar në punën time, nuk shikoj gjërat tjera. Jam përpjekur të jap më të mirën time nga vetja për ekipin dhe jo për t’u hakmarrë ndaj dikujt. Kjo ka rëndësi për mua, të ndihmoj ekipin të regjistroj rezultate sa më pozitive”.
Për përballjen ndaj ish-trajnerit Mezani, me të cilin kishin polemika në distancë nga koha kur u largua në Gjilani, futbollisti Greca u shpreh:
“Jam një futbollist që nuk merrem me fjalë, por vetëm bëj punën time. Gjërat tjera nuk më interesojnë, pasi që jam i përqendruar vetëm te puna me skuadrën time”.
Më pas ai është ndalur të flas për duelin e radhës ndaj Ballkanit, teksa ka besim të plotë se skuadra e tij do të vazhdojë me paraqitje të mira.
“Kemi filluar punën për ndeshjen e radhës. Besoj që skuadra do të jetë në formën optimale dhe do të japim maksimumin jo vetëm në këtë sfidë, por në secilën prej tyre”, shtoi ndër të tjerash Greca.
Tre gola qysh në javën e parë e bëjnë atë si një emër të spikatur për të fituar “Këpucën e Artë” këtë edicion, mirëpo për Grecën ky nuk është objektivi kryesor.
“Objektivi im është vetëm të jap maksimumin në çdo ndeshje dhe të ndihmoj ekipin tim”, përfundoi ai.