Legjenda e Interit, Marco Materazzi ka reaguar ndaj pretendimeve të Mario Balotellit se ai ka të njëjtat cilësi si Lionel Messi dhe Cristiano Ronaldo.
Balotelli e krahasoi veten me superyllin argjentinas dhe atë portugez në një intervistë për mediumin The Athletic.
“Jam 100 për qind i sigurt se cilësia ime është në të njëjtin nivel me këta njerëz, por unë… humba disa raste, e dini? Kjo ndodh”.
“Në ditët e sotme, nuk mund të them se jam aq i mirë sa Ronaldo, sepse Topa të Artë fitoi Ronaldo? Pesë? Ju nuk mund ta krahasoni veten me Messin dhe Ronaldon, askush nuk mundet. Por nëse po flasim vetëm për cilësinë, për cilësinë e futbollit, nuk kam asgjë për t’i xhelozuar, të jem i sinqertë”, ka thënë Balotelli.
Materazzi, i cili kaloi tre sezone në Inter me sulmuesin italian, hyri në llogarinë e tij zyrtare në Instagram duke bërë shaka me pretendimet e ‘SuperMarios’.
“Qetësohu, vëlla i vogël”, shkroi Materazzi, duke ndarë një ‘story’ të La Gazzetta dello Sport, e cila raportonte citimet e Balotellit.
Sulmuesi iu bashkua Manchester Cityt nga Interi në vitin 2010 pasi shënoi 28 gola në 86 ndeshje me Nerazzurrët.
Materazzi kaloi dhjetë vjet në Inter, duke luajtur 276 ndeshje me Nerazzurrët dhe duke shënuar 20 gola. /Telegrafi/