Do të jetë një verë e nxehtë për Elseid Hysajn. E ardhmja e tij te Napoli është e lidhur ngushtë me atë të trajnerit Maurizo Sarri, i cili sipas mediave italiane mund të largohet dhe një nga futbollistët më të kuotuar për të lënë skuadrën në rast të një lamtumirë të trajnerit është pikërisht mbrojtësi shqiptar.
Pretendentët për të janë në radhë, është folur për gjigantë të Ligës Premier, si Arsenal, Chelsea apo Manchester United, e po ashtu dhe interesimin e Bayernit të Mynihut.
Një sinjal që te Napoli po përgatitet edhe në rast të një largimi të Hysajt është se klubi po lëviz për të siguruar shërbimet e mbrojtësit të djathtë të Sampdorias, Bartosz Bereszynski.
Një lojtar që po sponsorizohet edhe nga shokët e tij në kombëtaren polake, Milik e Zielinski që i kanë folur për Napolin dhe projektin e tij, përcjell Supersport.
Këtë vit Hysaj ka qenë titullar fiks te Napoli ku ka konfirmuar se ka aftësi të mira si në fazën mbrojtëse, ashtu dhe në kapacitetin për të sulmuar në hapësirat e krahut të tij, por një arsye që Napoli po e kërkon mbrojtësin Bereszynski është për faktin se Hysaj ka në kontratë një klauzolë prej 50 milionë eurosh, dhe ndonjë nga klubet e mëdha angleze mund të shfaqet i gatshëm për ta shpenzuar këtë shifër për të garantuar kartonin e futbollistit shqiptar.
Vetë Hysaj e lidh të ardhmen e tij me atë të trajnerit, diçka që e bëri të ditur vetë agjenti i mbrojtësit shkodran , Mario Giufredi, i cili u shpreh se nëse Sarri qëndron atëherë do ti kërkojë presidentit qëndrimin e lojtarëve më të mirë, pra edhe Hysajt i cili do të humbiste shumë qartësi në rast të largimit të trajnerit.
Menaxheri i Napolit shtoi se nëse Sarri nuk do të jetë vitin e ardhshëm, atëherë dhe futbollisti shqiptar do të jetë i gatshëm për të dëgjuar skuadrat që janë të gatshme të paguajnë klauzolën e tij prej 50 milionë eurosh.