S.SH, i cili është i dyshuari për skandalin me mishin e prishur në Pejë, ka thënë para Gjykatës se mishin e konfiskuar nga Policia e kishte ruajtur për ta ushqyer qenin.
“Pasha zoten nuk e kam qit në shitje ata mish, mishin kam pas me ja qit qenit”, ka thënë ai, ndërkaq, Gjykata Themelore e Pejës të dyshuarit ia ka caktuar masën e paraburgimit prej 30 ditësh.
I dyshuari ishte i dënuar edhe më parë vepër penale të ngjashme.
Gjykata Themelore në Pejë e kishte dënuar me 3 muaj burgim me kusht.
Pikërisht gjatë periudhës së verifikimit të njëjtit në lokalin e tij i janë gjetur mbi 1000 kilogram mish i prishtë i cili kishte për qëllim të shitej në treg.
Prokuroria Themelore në Pejë ka nisur hetimet ndaj tre personave nën dyshimet se tentuan të shisnin për konsum produkte të dëmshme ushqimore.
Sipas Aktvendimit mbi fillimin e hetimeve M. B., pronari i lopës së sëmurë kishte tentuar ta shëronte lopën e sëmurë dy herë, mirëpo sëmundja e lopës ishte e pa shërueshme.
Duke e parë këtë M.B., kishte vendosur që lopën e sëmurë ta shiste, dhe për këtë qëllim si blerës të mundshëm e kishte thirrur S.SH.
S.Sh., së bashku me R.Sh. kishin shkuar në Trestenik për ta blerë lopën, raporton kallxo.
Lopa e sëmurë sipas Prokurorisë u ble 400 euro dhe u ther në stallën e shitësit M.B. në fshatin Trestenik të Pejës.
Sipas dosjes së Prokurorisë, pasi e kishin prerë e kishin futur në Golf 2 dhe e kishin transportuar tek lokali i S.SH, mish i cili pas kontrollit të policisë në të njëjtin vend u gjet, u konfiskua dhe u asgjësua.