Një tjetër aksident tragjik ka ndodhur mbrëmjen e së shtunës në Kosovë. Tre këmbësorë janë goditur nga një veturë në fshatin Ozdrim të Pejës, dy prej të cilëve kanë ndërruar jetë.
Si pasojë e plagëve të marra, këmbësori i lënduar është dërguar për tretman mjekësor në Spitalin e Pejës.
Lajmin për Telegrafin e ka konfirmuar zëdhënësi i Policisë së Kosovës për rajonin e Pejës, Driton Rugova.
“Rreth orës 21:30, policia është informuar për një aksident që ka ndodhur në fshatin Ozdrim të Pejës. Në aksident janë përfshirë një veturë dhe tre këmbësorë. Si pasojë, dy nga këmbësorët kanë vdekur. Vdekjen e tyre e ka konstatuar ekipi mjekësor. Njëri nga këmbësorët që ka mbijetuar, është dërguar për tretman mjekësor në Spitalin e Pejës”, ka thënë Rugova.
Ai tutje ka bërë të ditur se shoferi i veturës ndodhet në stacionin policor në Pejë.
Kujtojmë, sonte në Kosovë kanë ndodhur edhe dy aksidente tjera në Prishtinë e Podujevë. Si pasojë kanë mbetur të vdekur tre persona./Telegrafi/