Një numër fabrikash, disa prej të cilave deri vonë kanë qenë duke prodhuar, shumë shpejt do të jenë pronë e bankave. Kjo për shkakun se ato nuk arritën t’i shlyejnë borxhet e kredive.
Fabrika për prodhimin e armaturës FAN nga Podujeva dhe ajo për prodhimin e blloqeve termoizoluese, “Silcapor” nga Kaçaniku, janë dy nga fabrikat me të cilat njëra nga bankat në Kosovë po pret që me zgjidhjen e kontesteve gjyqësore dhe shitjen e tyre t’i nxjerrin paratë që u kanë mbetur borxh, raporton KTV.
Zyrtarë të bankave ankohen se nuk po mund të gjejnë blerës të ndërmarrjeve të konfiskuara.
Ndërsa, ekspertë të ekonomisë vlerësojnë se situata e tanishme është edhe për shkak të mënyrës së privatizimit të tyre, transmeton Koha.net.
Kohavisioni ka kërkuar të bisedojë me pronarët e “Silcaporit”, por ata nuk kanë shprehur gatishmërinë, me arsyetimin se po e presin vendimin përfundimtar të gjykatës, ndërsa drejtori i fabrikës FAN ka qenë i paqasshëm në telefon.
