Feronikeli arriti të merrte një pikë në udhëtimin në Gjilan përballë Dritës në ndeshjen e xhiros së 14-të të Superligës së Kosovës në futboll.
Ekipi nga Drenasi shënoi në pjesën e parë, mirëpo nuk arriti ta ruante epërsinë, pasi që vendasit arritën ta barazonin rezultatin në pjesën e dytë.
Trajneri i Feronikelit, Klodian Duro, ka thënë se të zgjedhurit e tij bënë një paraqitje shumë të mirë taktikisht dhe të luajtur me zemër.
Madje e ka ngacmuar Dritën duke thënë se kishte përballë një skuadër superkampione dhe se Intelektualët duhet t’i fitojnë ndeshjet me djersë.
Tutje trajneri ka theksuar se lojtarët e tij merituan pikë të plota, ndërsa ka përmendur momente të dyshimta për një penallti dhe një pozitë jashtë loje në gjysmën e dytë, si arsye pse nuk e fituan ndeshjen. /Telegrafi/