Drejtori sportiv i Interit, Piero Ausilio, rrëzoi shumë histori transferimesh që janë përfolur muajin e fundit, duke këmbëngulur se Lionel Messi, N’Golo Kante dhe Federico Chiesa nuk mund të vijnë te zikaltërit, pasi është e pamundur të transferohen, ndërsa sa i përket Marcelo Brozovic, ai mund të largohet.
Ausilio foli për Sportitalia në seancën e parë të Interit që po mbahet në Rimini, duke mohuar disa transferime që janë përfolur së fundmi.
“E vetmja gjë që mund të them është se Messin në Inter është e pamundur, nuk ka pasur kurrë ndonjë negociatë të çfarëdo lloji. Është e drejtë ta sqarojmë këtë një herë e përgjithmonë: Interi absolutisht nuk mund të përballojë lëvizje si kjo, pasi parametrat ekonomikë janë përtej mundësive tona”.
“Shpresoj që kjo është hera e fundit që njerëzit flasin për një negociatë që nuk ka ekzistuar kurrë”.
Ausilio gjithashtu foli edhe për raportimet se ka pasur oferta për anësorin e Fiorentinës, Chiesa dhe mesfushorin e Chelseat, që vlerësohet 50 milioën euro N’Golo Kante.
“Nuk ka asgjë me Chiesan. Ne e admirojmë djaloshin, por duhet të jemi realist për mundësitë që na lejon strategjia jonë e transferimit. Është e rëndësishme të jesh i sinqertë edhe me tifozët”.
“Kante është gjithashtu një lëvizje e pamundur për Interin. Mund të pranoj negociatat për Aleksandar Kolarov, pasi po flasim me Romën dhe me të. Është ende në procesin e negociatave, kështu që nuk ka asgjë përfundimtare ende”.
Kur bëhet fjalë për largimin e lojtarëve, Ausilio ishte i saktë.
“Brozovic e kuptoi që disa nga sjelljet e tij ishin të gabuara gjatë sezonit dhe disa situata u trajtuan pas dyerve të mbyllura në klub”.
“Ai është një nga lojtarët tek të cilët po mbështetemi, por nëse do të vinte një ofertë që i përshtatet lojtarit, ne do ta merrnim atë në konsideratë”.
“Vidal? Na pëlqen, kjo është e sigurt. Për momentin, ai është lojtar i Barcelonës. Nëse e lejojnë të largohet me kushtet e duhura, atëherë mund të mendojmë ta marrim”.
“Nainggolan? Është aset i Interit dhe ka ende dy vjet në kontratën e tij. Sot u paraqit në grumbullim dhe u vu në dispozicion të trajnerit. Do ta vlerësojmë me kujdes. Nuk e përjashtoj që ai mund të qëndrojë. Ka cilësi të shkëlqyera dhe besoj se mund të përmirësohet duke respektuar rregullat e sjelljes”.
“Milan Skriniar është një lojtar për të cilin kemi bërë një investim solid tre vjet më parë dhe ai ka bërë shumë mirë. Nuk ka bisedime për mbrojtësin”, deklaroi ai. /Telegrafi/