Votuesit britanikë zgjedhin kanë votuar sot (e enjte) qeverinë e re – për herë të dytë qëkur Mbretëria e Bashkuar votoi për Brexit-in, apo daljen nga Bashkimi Evropian.
Gjatë fushatës, Brexit-i pashmangshëm ka qenë lart në agjendë dhe kryeministri aktual, Boris Johnson, është zotuar se do ta përfundojë.
Votuesit zgjedhin një përfaqësues nga qarku i tyre lokal. Në total, 650 ligjvënës – një nga secili qark – do të zgjidhen anëtarë të Parlamentit, i cili vendos për ligjet dhe politikat e vendit.
Ndërkohë, ashtu si shumica e yjeve që kanë bërë thirrje për të dalë në votime – të njëjtën gjë kanë bërë edhe dy këngëtaret shqiptare reprezentative në Angli: Rita Ora dhe Dua Lipa.
Si njëra, ashtu edhe tjetra u kanë bë thirrje qytetarëve britanikë përmes rrjeteve sociale që të dalin në votime.
Dua Lipa publikoi një ditë më parë në rrjetin social Instagram disa fotografi, duke u sugjeruar fansave të saj nga Mbretëria e Bashkuar që të dalin në zgjedhje.
“Votoni, zgjedhjet më të rëndësishme në mbretërinë e Bashkuar janë nesër. Ju lutem shumë, votoni në mënyrën më të mirë të mundshme…ju lutem mos votoni për punët e ndyra”, shkroi Dua.
Në anën tjetër, Rita vendosi që në ditën e zgjedhjeve pra të enjten, t’jua kujtojë ndjekësve të saj se sa ditë e rëndësishme është kjo.
“Mbretëri e Bashkuar! Sot është një ditë e rëndësishme për të bërë diferencën! Dil dhe voto për të ardhmen tënde! Çdo votë numërohet”, shkroi Rita Ora në InstaStory.
Mesa duket, dy artistet me prejardhje shqiptare të cilat u rritën në Londër, e kanë kryer gjatë të enjtes obligimin e tyre qytetar. /Telegrafi/