Reperi Gold AG është shumë i dashur dhe i pëlqyer nga publiku shqiptar për këngët e tij.
Ai shquhet për temat e ndjeshme dhe patriotike që shpesh trajton në këngët e tij, të cilat godasin gjithmonë në veshin e publikut.
Gold Ag është bërë gjithashtu i njohur edhe për iniciativat e tij bamirëse që shpesh ndërmerr në të mirë të njerëzve, duke i ndihmuar nevojtarët sado pak që ai mundet.
Një gjë të tillë, reperi nga Presheva e ka bërë edhe së fundmi, teksa ka plotësuar dëshirën e vetme të një djali të vogël nga Shkupi, i cili vuan nga leukemia, dhe për pak ditë do t’i nënshtrohet një operimi.
Reperi ka marrë rrugën drejt Shkupit vetëm për të takuar enkas Ukën e vogël.
Telegrafi ka përcjell nga afër takimin e reperit me fansin, i cili ngeli i habitur dhe iu rikthye buzëqeshja në momentin që takoi idolin e tij.
“Në Shkup vizitova Ukën e vogël, i cili fatkeqësisht vuan nga leukemia, dhe kishte shprehur dëshirën e tij për të më parë, dhe sigurisht që realizova një vizitë me shumë kënaqësi”, tha Gold AG për Telegrafin.
Në klinikën ku vogëlushi aktualisht gjendet i shtrirë, për të bërë fotografi me reperin iu bashkuan edhe disa fëmijë të tjerë që gjendeshin andej pari.
Një takim plot shpresë dhe i përfunduar me buzëqeshje ishte ky i sotmi në Spitalin e Shkupit.
Me një përshëndetje gëzimi dhe shprese për një takim tjetër, Gold AG u largua nga spitali duke e përshëndetur Ukën me fjalët: “Mirupafshim, do të shihemi sërish, sapo sëmundja të ketë kaluar të jesh shëruar”. /Telegrafi/
