Të dielën do të zhvillohet xhiro e fundit e këtij edicioni në BKT Superligën e Kosovës në futboll.
Tanimë çështja e titullit të kampionit ka marrë fund, por edhe për skuadrat që do të dalin në Evropë.
Ballkani do të luaj në kualifikimet e Ligës së Kampionëve si kampion i ri i Kosovës, derisa Gjilani, Drita e Llapi do të luajnë në Ligën e Konferencës nga pozitat, dy, tre dhe katër.
Por ende nuk dihet se cila skuadër do të mbetet në barazh, pasi rrezikojnë pozitën e tetë ekipet si Prishtina, Dukagjini, Malisheva dhe Drenica.
Drenicasit janë më të favorizuar për t’iu shmangur asaj pozite pasi në ndeshjen e fundit luajnë në udhëtim te Feronikeli.
Padyshim dueli më interesant në këtë xhiro të fundit do të zhvillohet në stadiumin Liman Gega në Malishevë, ku Malisheva pret Dukagjinin.
Genc Nuza do ta ndajë drejtësinë në këtë përballje së bashku me ndihmësit Fatmir Sekiraqa dhe Hekuran Osmani.
Të gjithë duelet e xhiros së fundit në BKT Superligë zhvillohen me fillim nga ora 15:00. /Telegrafi/
