Pas hyrjes surprizë të Olta Gixharit në shtëpinë e Big Brother VIP Albania për të befasuar motrën e saj, Gertën, dhe për t’i dhënë fund thashethemeve se ato nuk flasin me njëra-tjetrën, ka shpërthyer një tjetër debat jashtë shtëpisë.
Prej kohësh, Rozana Radi ka deklaruar se Olta dhe Gerta nuk kanë raporte të mira dhe nuk flasin.
Mirëpo, pas paraqitjes së Oltës në shtëpi dhe përqafimit emocional me Gertën, Rozana është revoltuar duke pretenduar se ajo ka prova që vërtetojnë të kundërtën.
Rozana kërkoi publikisht që menaxheri i saj të publikonte mesazhet e shkëmbyera me Oltën, ku kjo e fundit e kishte uruar për pjesëmarrjen e saj në BBVA.
Mirëpo, situata mori një tjetër kthesë kur në rrjet dolën edhe mesazhet me zë të Oltës, të cilat zbuluan më shumë për mendimet e saj.
Në një nga mesazhet e audios, Olta dëgjohet duke thënë: “Po të flas si motër. Sa e bukur kjo ‘po të flas si motër’. Meqë ra fjala te motra, më duket se paskam edhe motrën time aty te Big-u.
Ajo s’ma ka thënë mua, por unë i marr vesh gjërat, sigurisht”.
Këto mesazhe kanë ndezur debat në rrjet, duke sjellë reagime të shumta nga ndjekësit, të cilët tashmë po pyesin nëse marrëdhënia mes Oltës dhe Gertës ka qenë vërtet e ftohtë apo gjithçka është një keqkuptim i madh.
Ndërkohë, mbetet për t’u parë nëse Olta do të reagojë ndaj publikimit të këtyre mesazheve dhe si do të zhvillohet më tej kjo histori. /Telegrafi/