Sauditët po përgatisin një raport që do të pranojë se vdekja e gazetarit saudit Jamal Khashoggi ishte rezultat i një marrje në pyetje që shkoi keq, sipas dy burimeve, shkruan CNN.
Sipas CNN, përcjell Telegrafi, një burim thotë se raporti ka të ngjarë të konkludojë se operacioni është kryer pa leje dhe transparencë dhe se ata që janë përfshirë do të mbahen përgjegjës.
Një nga burimet pranoi se raporti ende është duke u përgatitur dhe paralajmëron se gjërat mund të ndryshojnë.
Kolumnisti i Uashingtonit Post u pa për herë të fundit në publik kur hyri në konsullatën saudite në Stamboll në Turqi, më 2 tetor.
Më parë, autoritetet saudite kanë pretenduar se Khashoggi është larguar nga konsullata të njëjtën pasdite të vizitës së tij, por nuk ofruan prova për të mbështetur një pretendim të tillë.
E fejuara e Khashoggi, Hatice Cengiz, e cila ishte duke pritur jashtë konsullatës, thotë se nuk e ka parë atë të rishfaqet.
Zhdukja krijoi një çarje diplomatike midis Arabisë Saudite dhe Perëndimit. Në mes të pasojave, firmat ndërkombëtare u tërhoqën nga një samit i investimeve të profilit të lartë, që do të ndodhë më vonë këtë muaj në Riad.
Rasti gjithashtu shkaktoi fërkime midis Arabisë Saudite dhe Turqisë, e cila ka akuzuar në mënyrë të përsëritur sauditët se nuk kanë bashkëpunuar me hetimet e tyre.
Autoritetet turke më parë thanë se besonin se 15 burra sauditë, të cilët arritën në Stamboll më 2 tetor, ishin të lidhur me zhdukjen e Khashoggi dhe vrasjen e mundshme. Të paktën disa prej tyre duket se kanë lidhje të nivelit të lartë në qeverinë saudite.
Gjithashtu, të premten, një burim i njohur me hetimin ka thënë për CNN se autoritetet turke kanë dëshmi audio dhe vizuale që tregojnë se gazetari Khashoggi u vra brenda konsullatës.
Ndërkohë, gazetarët e CNN panë hetuesit turq, duke përfshirë oficerët e forenzikës, duke hyrë në konsullatën saudite në Stamboll të hënën në mbrëmje.
Më herët të hënën, Presidenti Donald Trump sugjeroi se “vrasësit mashtrues” mund të ishin pas zhdukjes së Khashoggi, pas një telefonate me Mbretin Salman të Arabisë Saudite rreth rastit.
Trump tha mbreti Salman i tha atij “në një mënyrë shumë bindëse se ata nuk kishin njohuri për të”. /Telegrafi/