Lionel Messi e kompletoi ciklin e nderimit të legjendës argjentinase, Diego Maradona, në fundjavën që lamë pas.
Të dy emrat e mëdhenj të futbollit kanë lidhje me Newell’s Old Boys, ku Messi kishte luajtur si fëmijë, kurse Maradona e kishte përfaqësuar ekipin e parë.
Superylli i Barcelonës e shënoi golin e katërt të Blaugranëve në ndeshjen ndaj Osasunas që ishte një rikrijim i një goli të Diegos të realizuar për Newell’s në vitin 1993 (atë ndeshje Messi e kishte shikuar nga tribunat si gjashtëvjeçar).
Në sfidën e të dielës, 33-vjeçari deshi që ta rikrijonte edhe golin e famshëm ‘Dora e Zotit’, mirëpo nuk ia doli ta bënte atë që legjenda e kishte shkruar historinë në Kampionatin Botëror kundër Anglisë.
Që të dy kanë luajtur për Barcën, ndërsa Messi është krahasuar me Maradonan gjatë gjithë karrierës së tij.
Dhe për ta nderuar ikonën që ndërroi jetë në javën e kaluar nga sulmi në zemër, Leo pasi e shënoi golin e hoqi fanellën e Barcelonës për ta ekspozuar fanellën e Newell’s Old Boys me numrin 10 legjendar që i referohej Maradonas.
Ngritja e duarve drejt qiellit ishte po ashtu një imitim i legjendës së ndjerë. Kështu zgjodhi njëri prej futbollistëve më të mëdhenj në histori ta nderonte një tjetër që po ashtu e ka të shkruar emrin në librat e historisë së futbollit. /Telegrafi/
