Kapiteni i Juventusit, Giorgio Chiellini pranon se është “goditur” nga mënyrat e përpikta të shefit të ri të shtabit teknik, Maurizio Sarri.
Ky i fundit e zëvendësoi Max Allegrin si trajner të Torinos më herët gjatë verës gjersa rreth strategut ka folur edhe mbrojtësi italian.
“Ajo që më ka goditur është se sa i përpiktë në të gjitha gjërat që bën”, tha futbollisti për televizionin e klubit.
“Mund të themi se është i përpiktë në nivelet më të larta sepse gjithmonë kërkon përsosmëri. Unë mendoj se kjo është ajo që më ka goditur më së shumti”.
“Ky ekip gjithmonë u ka dhënë përgjigje të gjithëve kur është duhur, por tani po bëjmë disa ndryshime”, tha futbollisti.
Ndryshe, paraqitjet e Bianconerëve gjatë ndeshjeve para sezonale kanë qenë të luhatshme. Kampioni italian ka pësuar humbje kundër Tottenham Hotspur dhe Atletico Madridit dhe ka realizuar fitore përmes penalltive ndaj Interit. /Telegrafi/