Paul Pogba u kthye nga Manchester United te Juventus këtë verë dhe ardhja e tij në Torino u prit me shumë entuziazëm nga tifozët e ‘Zonjës së Vjetër’.
Kur është në top formë, Pogba është një nga mesfushorët më të mirë në botë, por ai rrallë e tregoi këtë te Manchester United.
Legjenda italiene e futbollit, Fabio Cannavaro, i cili luajti për Juventusin për tre vjet, theksoi se është i shqetësuar për paraqitjet e fundit të Pogbas.
“Ishte emocionuese të shikoje Pogban në fushë, por vitet e fundit në Manchester United ai ishte i panjohur”.
“Ai mendon më shumë për flokët dhe pamjen e tij sesa për futbollin, prandaj nuk mund të jetë ndër më të mirët. Por unë jam i bindur se ai dëshiron të tregojë veten në vizitën e tij të dytë në Itali”, ka thënë Cannavaro.
Pogba aktualisht është i lënduar dhe Juventus shpreson që ai të rikuperohet sa më shpejt. /Telegrafi/