Kombëtarja shpresa e Shqipërisë U21, do të zhvilloj dy ndeshje miqësore në Antalia të Turqisë.
Të dyja ndeshjet kuqezinjtë do t’i zhvillojnë përballë moshatarëve të tyre nga Azerbejxhani.
Kombëtarja e drejtuar nga Alban Bushi do të ndeshet me 21 dhe me 26 janar ndaj Azerbejxhanit.
E risi në këtë listë është mbrojtësi prizrenas, David Domgjoni i cili ka shkëlqyer këtë edicion me Lirinë.
I kontaktuar nga Telegrafi, prizrenasi Domgjoni është shprehur shumë i lumtur me ftesën e marrë nga Kuqezinjtë.
“Jam i kënaqur me ftesën që më ka bërë trajneri Alban Bushi. Jam i bindur se besimin e tij do ta shpërblej me angazhim dhe paraqitje të mira”.
“Është nder dhe privilegj për çdo futbollistë që të vesh fanellën kuqezi”, tha Domgjoni për Telegrafin.
Mbrojtësi i talentuar ka qenë pika më e fortë në repartin defensivë te Liria.
Klubi bardh e zi këtë edicion është duke luftuar në dy fronte, kampionat dhe Kupën e Kosovës. /Telegrafi/
